“Ondo bizitzea” esan nahi du kitxuarren kosmobisioan. Jon Sarasuaren Ertzeko zatiak liburuaren harira, hainbat gairen inguruan eztabaidatu genuen irakurle taldean. Baina eztabaida guztien atzean zegoen galdera bat geratu zitzaidan taldekideei egiteke: zer da ondo bizitzea?
Emailez igorri nien galdera, eta hauxek dira jasotako erantzunak:
A irakurlea:
“Badago formula edo errezeta zahar bat horretarako:
Ondo bizi nahi badek
bizi
lehendabizi.
Eta formula horren azpian hauxe dagoela esango nuke:
Gero gerokoak: gure doktrinak omen, amen eta hemen.
Norbere bizitzak hirukote bat osatzen omen du: gaurkoa, atzoa eta biharra. Biharra ez omen da ezer, gaurkotik eta atzotik eratorritako ilusioa baino ez. Norberak iraganean ala orainean bizitzeko duen joeratik ihes egin eta bien arteko oreka aurkitzea omen da ondo bizitzeko gakoetako bat. Iragana ahaztu gabe orainean bizi, ez batean ez bestean ito gabe, geroan murgildu”.
Etorkizunari omen, orainari hemen eta iraganari amen? Sumaj kawsay!