Goiargi Abesbatza Komentuan

Datorren igandean, martxoak 30, San Jose Komentua zenaren kaperako aretoa ahots hutsez egindako musikaz beteko da berriro. Iazko irailean mezu bat jaso genuen Urretxutik, Goiargi Abesbatzak antolatzen duen Udazkeneko Jaialdian parte hartzeko gonbitea zen. Diskoaren grabaketatik bi asteetara soilik izan arren berehala aho batez baiezkoa eman genien. Urtean zehar egindako ekitaldi ezberdinetan eskainitako obrak eman genituen eta benetan kontzertu polita izan zen guretzat, Urretxuko parrokiako akustika ederraz gozatzeko aukera izan genuelarik.

Orain beraien txanda dator eta egitarau zabal bat ekarriko Zumarraga eta Urretxuko abeslariak biltzen duen kuro honek. Obra sakroekin ekingo diote kontzertuari, gaur egun egileen lanekin (Gjeilo, Vila, Antognini eta Molfino). Bigarren atal batean bidaiatzeko aukera izango dugu Kubako eta Filipinetako musika entzungai izango dugularik. Kontzertuaren azken atal euskal musikaz betea egongo da, euskal musikagile ezberdinen lanekin, besteak beste Xabier Sarasola, Josu Elberdin eta Zumarragan jaiotako Busca Sagastizabal. Hemen duzue egitarau osoa.

O SACRUM CONVIVIUM              L. Molfino

UBI CARITAS                                    O. Gjeilo

SANCTUS-BENEDICTUS               J. Vila

O MAGNUM MISTERIUM            I. Antognini

 

OJOS BRUJOS                                   E. Silva

UNA PENA NUEVAMENTE        R. Guastavino

ROSAS PANDAN                            G. Hernandez

 

XARMANGARRIA                         S. Salaberri

SAGARRAREN                                I. Busca Sagastizabal

ERRUKARRIA                                 X. Sarasola

ZURE BOZA                                      X. Sarasola

IZAR EDERRAK                              J. Elberdin

SARATARRA                                  J. M. Gzlez Bastida

ARITZ ADARREAN/KATTALIN J. Ezkurra

Kontzertua arratsaldeko 19:00etan hasiko da. Denak zaudete gonbidatuta

Kresala eta Garoa ikuskizuna

Abuztuarekin batera Zumaiako Musika Jaialdia dator. Urtez urte hainbat ekitaldi egin ditugu eta aurten kontzertu ezberdin bat proposatu nahi dizuegu. Txomin Agirrek Zumaian “Kresala” eta Garoa” nobelak idatzi zituenean ez zuen pentsatuko euskal literatura berritu egingo zuenik. Herriko pertsona xumeak jarri zituen bere eleberrien protagonista.

Bi nobela hauek ardatz hartuta musika herrikoian oinarrituko den kontzertu bat eskaini nahi dizuegu. Herriaren sustraietatik sortutako hainbat abesti ezagun entzuteko aukera izango duzue: Itsasoan laino dago, Andre Madalen, Axuri beltza… Zenbait kasutan Txomin Agirreren garaiko musikagileak moldatutakoak, beste kasuetan ordea gaur egungo musikagileek doinu zahar hauei idatzitako jantzi berriak entzuteko aukera izango duzue. Hor egongo dira Davida Azurza, Javier Busto eta Junkal Guerreroren lanak.

Istorioarekin lotuta ere entzungo ditugu beste estiloko obrak, Mercedes Sosak zabaldu zuen Ariel Ramirecen “Alfonsina y el mar” abestia eta Albert Alcarezek idatzitako “Nunc dimittis” obrak adibidez. Estrenaldi bat ere izango dugu kontzertu honetan, Gipuzkoako Abesbatzen Federazioan antolatzen duen “Sorkuntza Koralerako Languntzak” programaren barruan gure korukide den Iker Gonzalezek idatzitako “Itxaso ta eguzkia” obra. Balendiñe Albizuk idatzitako olerki batean oinarritzen da eta bertan koruaren ahotsez gain pianoa eta klarinetea entzungo dira.

Ekitaldi honetan, Amaia Aldarruren zuzendaritzapean egongo den San Pedro Abesbatzaz gain, Mari Carmen Azpeitia piano-jolea, Mikel Emezabal klarinete-jolea, Manu Aguilar gitarra-jolea eta Ioseba Matias albokaria parte hartuko dute. Astindu taldekoek ere izango dute bere lekua emanaldi honetan eta emanaldi osoan zehar Distira Argazki taldekoek egindako argazkiak proiektatuko dira musikari laguntzeko.

Denok zaudete gonbidatuta

Mari Kaletik Harlem-era

Ekainaren 21ean ospatzen da munduan zehar Musikaren Eguna. Egun bat geroago, larunbata ekainak 22, eskainiko dugu Beheko Plaza Aesbatzako kideen batera azken urteetan ohiko bihurtu den Mari Kaleko gau kontzertua.

Gure aldetik estilo esberdinetako obrak eskainiko ditugu. Berri honen izenburuak dioen modura Mari Kaletik abiatu eta New York-eko Harlem auzora iritxiko gara, musika lagun. Eskainiko dugun lehen abestia zumaiar kutsua duela esan genezake, bere izena bakarri ikusi behar da “Ardantzako pikuak”. Abesti honen hitzak Balendiñe Albisurenak dira eta musika berriz koruko kide den Iker Gonzalezena. Belendiñek ume kontuak ekarriko dizkigu, Ardantza baserriaren inguruan dauden pikuak lapurtzera joaten zireneko komeriak, hain zuzen. Bigarren abestiaren doinua Resurrección Maria de Azkuek bildutako bat da eta doinu herrikoi hau gaurko musikaz jantzi jantzi duena Junkal Guerrero musikagile andoaindarra izan da. Euskal abestien artean ezagunetakoa dugu “Maritxu nora zoaz” hitz berdinei jarritako doinu ezberdinekin gainera. Bi doinu ezagunenak agertuko zaizkigu Javier Bustok egindako moldaketan, bere egilearen  estiloari jarraituz doinu herrikoiak eta harmonia berriak uztartuko dira abesti honetan.

Harlem auzoan amaituko dugula esan dugu baina aurrez Kuba eta Argentina bisitatuko ditugu. Abesti herrikoien egileak askotan ahaztu egiten dira mendeen iluntasunean. Sindo Garay-ren musika “trova” deritzan estilo herrikoia oinarritzen da eta ikasketa musikalak burutu ez izan arren, guztien miresmena lortu zuen. Bere abestien artean ezagunenetako bat eskainiko dizuegu, “La tarde” izenburua duena. Askotan musikagilearen izena abeslariaren izenaren hitzalpean geratzen da, hurrengo abestia honen adibide dugu. “Alfonsina y el mar” aipatzen badegu, ziurrenik Mercedes Sosa-ren izena etoriko zaizue burura, abesti hau abestu zuen lehenengo pertsona. Ez zen ordea berea abesti hau, bere egilea Ariel Ramirez izan zen. Argentinako musikagile honek bertako herri musika indartzen zaiatu zen, musika tresna herrikoien lan eginez.

Azken bi abestiek berriz New York-eko Harlem-era eramango gaituzte. L. Tyson eta L. Scott-ek idatzitako “Feel good”  eta R.Ray-k idatzitako “He never failed me yet” abestiak gaur egungo gospel musikaren bi adibide ditugu, biak erritmoz beteak. Kontzertuari amiera emateko etxera bueltatuko garela esan dezakegu, bi koruek batera Mikel Laboak idatzitako 2Nerea izango zen” abesti ezaguna eskainiko baitugu Javier Bustoren moldaketan.

Pianoan Mari Carmen Azpeitia izango dugu eta gitarran berriz Manu Aguilar. Zuzendari bezala, nola ez, Amaia Aldalur. Denok zaudete gonbidatuta…

 

 

ITSASOAREN AHOTSAK · Bideoak

Pasa den larunbatean, maiatzak 25 Olatu Talka egitarauaren barne, Zumaiako komentuan “Itsasoaren Ahotsak” izeneko kontzertua eskeini genuen Hondarribiko ESKIFAIA abesbatzarekin. Sekulako plazerra izan zen beraiekin batera abestea eta baita “plaza” jendez beterik ikustea. Gure aldetik eskerrik asko kontzertura etorri zinetenoi eta nola ez Eskifaia abesbatzari gure gonbidapena onartzeagatik.

Hementxe duzue kontzertua ikusgai.

Continue reading ‘ITSASOAREN AHOTSAK · Bideoak’

Eskifaia Abesbatza Komentuan

Asteburu honetan hainbat ekitaldi egingo dira Donostia 2016-k sustatzen duen “Olatu Talka” izeneko ekimenean. Horietako bat izango da larunbatean Komentuan izango dugun kontzertu berezia, “Itsasoaren ahotsak..” izenburupean datorrena. Bertan Hondarribiko Eskifaia Abesbatza entzuteko aukera izango dugu, talde hau historikotzat jo dezakegu 1978an sortu baitzen Javier Busto zuzendari eta musikagile ezagunaren eskutik. Hainbat lehiaketetan parte hartu izan du bere bizitza luzean besteak beste Tolosako Nazioarteko Lehiaketa esanguratsuan.

 


 

Kontzertu bi zatitan banatuta dagoela esan genezake. Lehenengo zatian San Pedro Abesbatzako kideak izango gara oholtza gainean. Kontzertu honetarako estilo eta jatorri oso ezberdineko piezak aukeratu ditugu, letonieraz, alemanez, latinez eta frantsesez abestuko baitugu. Letoniako musika herrikoia izango dugu “Gula Meitina” abesti goxoarekin, herri musikan sustraitzen den Beethovenen “Ich liebe dich” lied-a entzungo dugu koruko gizonen ahotsetan. Emakumeek berriz Xabier Sarasola musikagile beasaindarraren bi obra sakro eskainiko dizkigute: Ave Iesu eta Pange Lingua. Gure saioa amaitzeko Morten Lauridsen musikagile amerikarrak idatzitako “Dirait-on” obra eskainiko dugu.

Hondarribitik ere musika ezberdinak etorriko zaizkigu. Komentuko akustikara hain ondo egokitzen den musika sakroko lau adibide izango ditugu beraien emanaldiaren hasieran, Ingalaterra eta Eskoziatik etorriko zaizkigun: “Now is the month of maying”, “O radiant Dawn” eta “Benedicimus” alde batetik eta bestetik Aita Donostiaren “Virgo Dei Genitrix”. Honen ondoren koruaren sortzeile izan zen Javier Bustoren bi obra: “Esta tierra” eta “A tu lado”. Azken bi abestirekin Hegoamerikara bidaliatzeko aukera izango dugu Carlos Guastavinoren “Una pena nuevamente” eta Alberto Faveroren “Te quiero” abestien eskutik. Guzti hau Gorka Aierberen zuzendaritzapean.

Emanaldiari amaiera emateko bi koruek batera euskal folklorean oinarritutako bi obra eskeiniko ditugu, David Azurzaren “areson aleka” eta Josu Elberdinen “Segalariak”. Kontzertua arratsaldeko 19:00etan hasiko da. Gonbidatuta zaudete…

 

Kantuz aldizkaria

Egun hauetan kaleratu da Euskal Herriko Abesbatzen Elkarteak argitaratzen duen “Kantuz” aldizkariko 100. zenbakia. Zenbaki borobila eta urteetan egindako lanaren adibide. Oraingoan gainera gure koruarekin zein Zumaiarekin lotutako berri ezberdinak agertzen dira.

Aldizkariaren portada ikustea besterik ez dago argazkia garai bateko Mojaxarren Komentuan aterata dagoela. Iazko abenduan Zumaian ospatu zen elkarteak antolatzen duen “Kantaldi Irekia”. Aste buru luze batez Ubillos Jauregiko gelak korurako musikaz bete ziren, bazter ezberdinetatik etorritako hainbat abeslariei esker. Gure korukide den Iker Gonzalezek honen inguruan idatzitako kronika irakurri ahal izango duzue bertan. Baina ez da hau aipamen bakarra izango, beste kronika batean Tolosan ospatutako Topaketaren berri ematen da. Eta guzti hau gutxi ez balitz “Ama Lur” obraren estreinaldiaren aipamen bat ere aurki dezakegu, azken hilabeteetan egin diren beste estreinaldien artean.

Hemen deskargatu dezakezue aurkeztutako zatiak biltzen duen artxibo bat. Aldizkari osoa nahi duenarentzat berriz lotura honetan aurkituko du. Bitxikeri moduan esan Tolosako Topaketaren berriemailea Gorka Aierdi dela, Eskifaiaren zuzendaria. Datorren Maiatzaren 25ean Zumaian izango dugu Hondarribiko korua, gurekin bat kontzertu bat eskaintzeko. Hemen duzue entsaio batean ateratako argazki bat. Aurki izango duzue kontzertu berezi honen berri.

San Telmo Martxaren partitura

Datozen egunetan Zumaia kolore urdinez jantziko da eta kresal kutsua hartuko du: San Telmoak datoz. Gure herriko kaleak musikaz beteko dira eta doinu guztien artean bat izango da bereziena: San Telmo Martxa. Baina, nork idatzi zuen? Nondik sortu zen gure barrenak mugitu arazten dituen doinu hau? Txikitatik nire buruari egin diodan galdera izan da eta zoritxarrez oraindik ez diot erantzunik aurkitu. Bandako partaide ohiei galdetuta erantzuten dute “Marcha a la Virgen de Lidón” zela jatorriz guk San Telmo Martxa bezala ezagutzen duguna. Bandako artxiboan ordea ez dago partitura originalik eta ez dago bere egilearen arrastorik.

 

Izena ikusita bi aukera daude, alde batetik Lidón egilearen abizena izatea edota “Virgen de Lidón” nonbaiteko Ama Birjina izatea. Lehenengo aukera arraroagoa dirudien arren badago musikagile bat José Lidón izenarekin baina bizi zen garaia ikusita  (1748-1827) eta entzun ditudan obrak kontutan harturik, ez dirudi bera izan daitekeenik San Telmo Martxaren egilea. Bigarren aztarna “jarraitzen” ari nintzela, interneteko tresnei esker, jakin nuen “Verge de Lledó” edota “Virgen de Lidón” gaztelaniaz Castellóngo Ama Birjina zela.  Ikusita mediterraneo alde horretan musika bandek duten indarra ez zen arraroa izango doinua bertatik etortzea. Aurkitu nuen obra bat izen berekoa, bere egilea Vicente Portolés  zen eta bere estiloa ikusita (XX. Mendekoa, batez ere pasodobleen eta festarako musikaren egilea…) aukera interesgarria izan zitekeen. Zoritxarrez obra honen partitura jaso nuenean ez zen bilatzen ari nintzena. Guzti hau kontutan hartuta ikerketa hau geldirik dago, baina espero dut egunen batean jarraitu eta emaitzen bat lortu ahal izatea.

Musika bera aztertuz gero bitxia da nolako indarra hartu duen ikustea, ez baita, hasieran behintzat, festarako idatzitako obra bat. Prozesio batean jotzeko idatzitako martxa bat da, erritmo lasai eta seriokoa. Sarrera ikustea besterik ez dago, bonboaren erredoblearen gainean idatzitako unisono batekin hasten da, gero musika “zabaltzen delarik”. Honen ondoren dator “lehenengo gaia” bezala hartu dezakeguna, estilo seriokoa eta lasaia, ez dugu ahaztu behar prozesio bat laguntzeko idatzi zela. Doinua berriro errepikatzen da amaierako aldaketa txiki batekin eta honen ondoren sartzen da hurrengo zatia, martxen munduan “fuerte de bajos” bezala ezagutzen dena. Ohikoena doinua musika tresna agudoetan egotea da (klarinete, saxo alto, tronpeta, flauta), grabeen lana (tuba, tronboiak)  ordea musikaren oinarria sortzea izaten da normalean. Zati honetan doinua musika tresna grabeenek jotzen dute (tuba, bonbardinoa eta tronboiak hain zuzen) besteek, akonpainamendu giza, nota bera errepikatzen duten bitartean. Zati indartsuagoa da azken hau baina baita tristeagoa ere modu minorrean idatzita baitago.

“Lehenengo gaia” errepikatu ondoren lotura bat entzuten dugu. Berez hau izan daiteke obraren amaiera, obra behin da berriz errepikatzen dela kontutan izanik. Honen ondoren “trio” deritzan zatia aurkitzen dugu. Zati hau aurrekoarekin konparatzen baldin badugu alaiagoa da, “kolore” aldaketa dago (tonalitatea aldatzen da hitz musikaletan esanda) eta konpas bera jarraitzen duen arren badirudi musika gehiago mugitzen dela. Horrelako zatiak beti erabili dira zerbait berria sartzeko, honen lekuko Chopin-en hileta martxa, lehenengo zati ilunaren aurrean oso musika goxoa ekartzen digu trioak.

Eskema hau prozesio martxetan guztiz ohikoa da eta bere sortzailea Manuel Lopez Farfán izan zela esan daiteke. Hau kontutan hartuta esan daiteke San Telmo Martxa 1925a baina beranduago idatzi zela, orduan sortu bai zuen Farfánek eskema hau “La Estrella Sublime” prozesio martxarako.

Esan dudan moduan bitxia da horrelako musika bat jaietako doinurik kuttunena bihurtzea baina musikak indar berezi hau du. Hemen duzue San Telmo Martxaren transkripzioa, pianorako moldatu dut eta horren gainean doinua bakarrik jarri dut musika tresna melodikoekin (flauta, klarinete, biolin…) jo ahal izateko. Bi iturri izan ditut lan hau egiterako orduan, alde batetik Mari Carmen Azpeitiak harmonium-erako egindako moldaketa eta bestetik Zumaiako Musika Bandak erabiltzen duen partitura. Mila esker guztiei eta baita Mikel Emezabali lan hau aurrera ateratzeko eman didan aholkularitzatik.

Gora San Telmo!

2012a Kantuz Kantu…

Kantuz kantu, egunez egun 2012 bere hondarretan dugu. Hau ere musikaz betetako urtea izan da, honetan behintzat ez dugu krisiaren olatuen eragina izan. Urtero bezala begirada txiki bat bota nahi diogu egindakoari, ez iraganean geratzeko asmoz, egindakoa etorkizunean egingo dugunaren oinarri izatea nahi dugulako baizik.

Oraindik gure buru eta belarrietan gabon abestien eta Queen-en “Bohemian Rapshody”-ren oihartzunak entzuten zirenean gure hurrengo erronkari ekin genion. Beti gustatu zaigu, urtean zehar, kontzertu ezberdinak eskaintzea. Horregatik Erramu Egunaren bezperan Aste Santua oinarri hartuko zuen kontzertu sakro bat prestatu genuen. Zenbait abesti berreskuratu eta beste zenbait ikasi. Aipatutako berrikuntzen adibide bitxi bat ere azaldu dezakegu, 2010eko abuztuko kontzerturako gizonak Beethoven-en “Ich liebe dich” lieder-a ikasten ari zirela hainbat aldiz entzun behar izan zuten: “Baina gizonak bakarrik abestu behar al dute?”. Kontzertu sakroan bost abesti eskaini zizkiguten, urte hauetan egindako lanaren adibide garbi bat.

Kartela

Kontzertu hura prestatzen ari ginela Gipuzkoako Abesbatzen Federaziotik mezu bat jaso genuen, modu batean urteko aurreikuspenak hankaz gora jarri zituena. Tolosako Abesbatzen Lehiaketaren barne ospatzen den Topaketak izeneko ekitaldian parte hartzera gonbidatzen ziguten. Nola ez, ezinezkoa zen ezezkorik ematea, erronka ederra zelako guretzat, geure lana aurkezteko toki paregabea benetan. Hitzordua urrian izango zen baina garbi geneukan kontutan hartu behar genuela urteko plangintzan.

Ez zen ordea erronka bakarra, abuzturako kontzertu berezi bat prestatu nahi genuen. Ez ginen ordea taula gainean bakarrik egongo Debako Aitzuri Abesbatza izango genuen lagun. Bi abesbatza, bi zuzendari eta bi egitarau guztiz ezberdinak. Lehenengo zatian Mozarten Koroatze Meza eta bigarrenean batez ere gaur egungo musikarien lanak: Eric Whitacre, David Azurza… Eskainitako obren artean esangura berezia izan zuen gure koruko kide den Iker Gonzalezen “Ama Lur” lanaren estreinaldia. Hamaika izerdi bota behar izan genuen ikasteko baina benetan gustura egindako lana izan zela esan dezakegu. Entzuleriarentzat kontzertuaren unea besterik geratzen da, baina guretzat balio handia du egindako lana, Deban edota gure musika eskolan egindako entseguak, baita hain ezberdinak diren bi zuzendari gure aurrean izateak, Fefe bere energia amaiezinez betetako zuzendaritza indartsuarekin eta Amaia sentimenduz betetako zuzendaritza goxoarekin.

Ondo merezitako oporren ondoren Tolosako erronkari ekin genion. Hodeit Truk eta Amestza abesbatzekin batera egin behar genituen kantuak ikasteaz gain gure egitaraua prestatu behar genuen. Ez da erraza hamabost minututan zure lana islatzea, horregatik gutxienez koruak eskaini ditzakeen estilo ezberdinak agertu nahi izan genituen. Alde batetik errenazimenduko bi abesti sakro, biak ordea guztiz ezberdinak, bata serioa eta bestea alaia, Ostiral Santu eta Pazko Igandea bata bestearen ondoan. Hauek tradizioa erakutsi bazuten beste biak gaur egungo musika laga zuten agerian, aurten guk egindako bi estreinaldi izan baitziren: Tolosako David Azurza musikagilearen “Areson aleka” eta aurrez aipatutako “Ama Lur”.  Gertatu ohi den bezala, egindako lana agerian geratzen da eta horrela gertatu zen Tolosan. Hainbat zorion jaso genituen bertan biluta zeuden musikagile, abeslari eta zuzendarien eskutik. Kontutan hartuta ekitaldi hau gure herrialdean egiten den lanaren erakustokia dela, benetan pozik egoteko  modukoa.

Aurrez esan dugun bezala, estilo ezberdinak landu nahi ditugu. Honen adibide Mari Kalean edota  Alondegian Xexiliren omenez egindako kontzertu xumeak. Musika tresnak lagun normalean abesbatzen egitarauetatik kanpo geratzen diren musikagileen lanak eskainiz: Eric Clapton, Sorotan Bele, Kubako musika, Xabier Lete edota Imanol…

Eta urteari amaiera emateko, azken urtean ohitura bihurtu den Gabon Kontzertua. Aurten Usurbilen eskaini genuen bertako Zumarte Musika Eskolako talde ezberdinekin batera. Oroitzapen ederrak ekartzen dizkiguten “Aritz Adarrean” eta “Olentzero” abestiez gain beste lan ezberdinak egin genituen. Iaz Usurbilgo jendea gurekin eta Zumaiako Bandarekin bat egin zuten bezala, aurten gu izan gara bertara joan garenak.

Amaitzeko gure eskerrik beroenak azken 366 egunetan gurekin bat egon zareten guztioi. Hemen duzue 2012ko irudian biltzen dituen bideo txiki bat.

Usurbilen Gabon Kontzertua

Gabonak datoz,usadioz betetako egunak,azken urteetan ia usadio bihurtu da guretzat Gabon Kontzertu bat eskaintzea.Aurten Usurbilen eskainiko dugu bertako Zumarte Musika Eskolako beste hiru koruekin batera. Bitxikeria moduan esan daiteke 2009an Errenteriako Gabon Abestien Lehiaketan parte hartu genuenean, Zumarte Gazte koruak ere hartu zuela,beraiek talde herrikoien artean. Ez bakarrik parte hartu, beraiek ere beraien mailan irabazi baitzuten.

Kontzertua igandean izango da Usurbilgo San Salvador Parrokian, 12etako meza amaitu ondoren. Aurreko mezan ere parte hartuko dugu, Zumarte Gazte koruarekin batera Ola Gjeilo-ren “Ubi Caritas” eta Mozarten “Ave Verum Corpus” kantatuz. Oraina eta lehena batera, Mozartek ez baitu aurkezpenik behar eta Ola Gjeilo sona handia lortzen ari den musikagile gazte bat baita.

Gabon giroan egindako kontzertua izan arren lehenengo zatian eskainiko ditugun abestiak ez dira gabonetakoak izango. Kontzertuari hasiera Zumarte Gaztek emango dio,Morten Lauridsen musikagile amerikarraren “Dirit don” abestiarekin eta Josu Elberdinen “Exultate Justi” motetearekin. Honen ondoren gure txanda iritxiko da gure koruko kide den Iker Gonzalezen “Ama Lur” obrarekin.

Orduan izango dugu abeslari txikienak entzuteko aukera, Kantu-Kantari taldeak gabonetako musikan murgilduko baitugu”Elur zuria” kanonarekin. Zumarte Talde Bokalak berriz Xabier Sarasolaren “Gau ilunak ez badu”eskainiko digute, baita, Kantu-Kantarikoekin batera, David Azurzaren “Trakatan, trakatan” abestiaren moldaketa. Zumarte Gaztekoek berriz Javier Bustoren “Oi Eguberri Gaua”eta A. Adams-en “O Gau Santu” abestuko dituzte. Gure ahotsen entzungai izango duzue Julen Ezkurraren “Aritz adarrean – Kattalin” eta Javier Bustoren moldaketan “Olentzero”.

Kontzertuari amaiera emateko Zumarte Gaztek eta San Pedro Abesbatzak beraien ahotsak batuko dituzte Josu Elberdinen “Izar ederrak”eta Irvin Berlin-en “White Christmas” eskaintzeko. Hainbat abestietan pianoa lagun izango dugu eta lan horretan Mari Carmen Azpeitia arituko da, baita ere mezetan organoarekin Cavaille-Coll organo famatuan. Zenbait piezetan gainera Zumarte Musika Eskolako kideak ere izango ditugu beraien musika tresnekin laguntzen. Eta nola ez, talde guztien zuzendaria izanik, kontzertuaren zuzendaritza Amaia Aldalur Goikoetxearen esku izango dugu.

Gabonei harrera polita egiteko aukera izango duzue Usurbilen datorren igandean. Gonbidatuta zaudete….

EGUBERRI ON!!!

San Pedro Abesbatza Tolosako Topaketan

Azaroaren atarian gaudenean, Tolosa abesbatzen musikaren oihartzunak hartu du. 44 urte igaro dira bertan Nazioarteko Abesbatza Lehiaketa ospatzen hasi zirenetik, urte guzti hauetan zehar mundu guztiko abesbatzek bere doinuak eta folklorea ekarri izan dute abesbatzen munduan geneukan ikuspegia zeharo zabalduz.
Azken urteetan ordea musika ez da Tolosara mugatu, bertara datozen taldeek hainbat kontzertu eskaintzen dituzte herri ezberdinetan. Aurten adibidez Indonesiako “MARANATHAN CHRISTIAN UNIVERSITY CHOIR”  abesbatzarekin gozatzeko aukera izango dugu.

Tolosako Kartela

Tolosako Abesbatza Lehiaketaren kartela

Ekitaldi honen aurkezpena datorren larunbatean burutuko da “Topaketa” izenez ezagutzen den kontzertuaren barne. Azken urteetan egiten den moduan CIT-ek (Centro de Iniciativas de Tolosa) eta Gipuzkoako Abesbatzen Federazioak hiru abesbatza ezberdin gonbidatu dituzte bertan parte hartzera. Eta asmatuko zenuten moduan gu hiru talde horietako bat gara.

Benetan poza eta harridura sortu zigun gonbite hau jasotzeak, are gehiago azken urteetan parte duten abesbatzak ikusirik. Ez genekien zergatik izan ginen aukeratuak baina garbi geneukan urteko erronka nagusienetako bat izango zela, nolabait esateko Tolosa garai honetan plaza berezia bihurtzen baita. Lehenengo lana egitaraua aukeratzea zen. Hamabost minutuko lana egin behar genuen eta lantzen ditugun estilo ezberdinak eskaini nahi genituen. Kontzertua eliza batean izanik bi obra sakrorekin ekingo diogu gure ekitaldiari, polifonia alorrean kokatzen diren horietakoak. Lehengoa Joanes de Antxieta musikagile azpeitiarrari egotzitako “O bone Jesu” motetea. Errenazimenduaren hasierako polifoniaren adibide eder bat, estilo sakonekoa baina aldi berean lan argitsua. Mende bat beranduago bizi izan zen Gregor Aichinger musikagile alemaniarra, berea da “Regina Caeli” abestia alaia. Esan daiteke obra honekin garizumatik pazkora joaten garela, energiaz eta alaitasunez betetako obra bat baita.
Lehenengo bi obra hauek Errenazimenduan kokatzen diren bitartean gure emanaldiaren bigarrengo zatia osatzen dutenak gaur egungoak dira. Bitxikeri moduan esan dezakegu bi obra hauen egileak Topaketa bertan parte hartuko dutela. “Ama Lur” abestia gure koruko den Iker Gonzalez Cobeagak egina dela, joan zen abuztuan Debako Aitzuri abesbatzarekin eskainitako kontzertuetan estreinatua izen zen eta eskainiko dugun obrarik luzeena izango da. Obra honetan piano-jole giza Mari Carmen Azpeitia arituko da eta bertan antzinako sonoritate eta erritmoak gaur egungo harmoniekin uztartuko dira, Bitoriano Gandiaga olerkariaren lau lan guzti honen ardatz izango direlarik.

Bitoriano Gandiaga

Bitoriano Gandiaga

Kontzertuak obra alai eta indartsuekin amaitu ohi izan dira. Horretarako aukeratu dugu David Azurza musikagile tolosarraren “Areson Aleka” abestia. Esan behar dugu David Azurza Topaketan parte hartuko duen beste talde baten zuzendaria dela, Hodei Truk taldearen hain zuzen. Iparraldeko koru batentzat idatzia izan zen eta Emeterio Arreseren hitzak ditu. Gure ekitaldian zehar, nola ez, Amaia Aldalur izango dugu zuzendari. Ekitaldia Tolosako “San Frantzisko” elizan egingo da 20:00etan. Lehenengo taldea izango gara parte hartzen, ondoren etorriko dira Tolosako Hodei Truk eta Irungo “Coro Ametsa” Fernando Etxepareren zuzendaritzapean.

San Frantsizko Eliza

San Frantsizko Eliza

Kontzertuari amaiera emateko Gorka Ayerberen zuzendaritzapean hiru taldeek bi obra eskainiko ditugu: Francisco Escuderoren “Izar ederra” bere jaiotzaren mendeurrenean eta Javier Busto musikagile hondarribitarraren “Puer natus est”.


Ekitaldi honetara gonbidatu nahi zaituztegu.