Zumaia Salegi Jatetxek erakustaldia eman du gaur, Zarautzen, eta oso gertu du Euskotren liga irabaztea. Bi puntuko aldea ateratzen dio Galiziari, eta bihar da azken estropada, gaurko leku berean (12:00).
Sekulakoa egin dute zumaiarrek. Hasieratik hartu dute estropada burua, eta segundoak ateraz joan dira. Ziabogan, sei atzetik zen Getaria-Tolosa, zazpira zegoen Galizia, eta hamabira San Juan.
Bigarren luzean, gora egin du aldeak. Azkenean, hamabi atera dizkio Galiziari, hamalau Getaria-Tolosari, eta hogeita bost San Juani.
Liga eskura edukitzeaz gain, Zarauzko bandera ere gertu da, gaurko eta biharko denborak kontuan hartuko direlako.