Urtarrilean, Eider Rodriguez

Idazle handi batekin hasiko dugu urtea: urtarrilaren 9an Eider Rodriguez ipuingile oreretarra izango dugu gurekin bere azken lana, Bihotz handiegia, disekzionatzeko. Sei narraziok osatzen dute liburua, arroztasun samurrez, tentuz idatziak denak, diafragmaren zokoren batean katigatzen direnak bertan irauteko.

“Ez du batere gogorik senar ohia zaintzera joateko, baina alabak hala eskatu dio eta gizonari bizialdi laburra geratzen zaionez, ahalegin txiki bat egin behar luke agian. Liburu honi izenburua ematen dion kontakizun luzeena eta lehendabizikoa da “Bihotz handiegia”, garai baten amaierari buruz diharduena, maitasunaren hondakinez.

Arroztasun sentipena dute Eider Rodriguezen sei ipuinetako pertsonaiek: nolakoa izaten ari da bikote bizitza hau, zein desio ote ditu auzokide perfektuak, nor bihurtu gara sute ikaragarriaren ondoren, ginekologoak erakutsiko al dit nolakoa naizen barrutik, zer espero zuten izango nintzela, norenak dira esku hauek.

Konplexuak eta arruntak dira aldi berean hemengo bizilagunak, jarrera ideologikoaren eta irrika eutsiezinaren arteko lehian dabiltzanak batzuetan, zalantzati edo kontraesanean, baina gorabeherei beti aurre egiten”.

Segidan, liburuari buruzko informazio osagarria:

Kritikak
-Elkarrizketa Ahoz ahon Ilaski Serranorekin
-Elkarrizketa Deia

Kattalin Minerrekin solasean

 Solasaldi atsegina izan genuen atzo Kattalin Miner idazle hernaniarrarekin. “Nola heldu naiz ni honaino?” opera primari buruz aritu ginen, nobelako protagonistak, Jezabelek, atsegin duen bezala, te-pastak janez, literaturaz mintzatu bitartean. Hurrengo saioa azaroaren 12an izango da: Joseba Sarrionandiaren Lapur banden etika ala politika saiakera komentatuko dugu.

Datozen hilabeteetarako programa:

Jarraitu irakurtzen

Abenduan, Sarrionandia

Abenduaren 12an Joseba Sarrionandiaren azken saiakeraz hitz egingo dugu. “Lapur banden etika ala politika” jarri zion izenburua Iurretarrak lan sakon, ausart eta eder honi,

Memoria onekoa eta tolestura anitzekoa, apala eta ausarta da Joseba Sarrionandiaren saiakera hau. Azken hamarkadetako eta gaur eguneko gure errealitate politikoaren inguruan mintzo da: gai asko eta askotarikoen artean, dominazioaz eta sektarismoaz, gutasuna aniztu beharraz eta politika egiteko ezintasunaz, hau da, politika egiteko obligazioaz. Kritika eta autokritika arrazoituaren bidez, teoria politiko oso bat doa azaltzen, botere ekonomiko, politiko eta militarren kontra, subjektu sozialak errebindikatzen dituena.

Umorea ere falta ez duen testu honek, ustekabean batzuetan, zer pentsatu emango dio irakurleari, saiakera eta literatura hoberenak egiten duen gisan. Ados dagoela konturatzera edo ados ez dagoela ebaztera behartuko du irakurlea. Autorea urrun omen dabil oso aspalditik, baina inork ez du esango hemengo arazoak benetan bizi eta bere kasa hausnartzen ez dituenik. Hemengo arazoak, jakina, mundu guztikoak dira.

Hemen duzue material osagarria:
Kritikak
-Aurkezpeneko bideoa

 

Azaroan, Kattalin Miner

Azaroko bilkuran Kattalin Minerren lehendabiziko nobela izango dugu mintzagai: “Nola heldu naiz ni honaino”. Igartza beka irabazita, urte hasieran kaleratu zuen elbe

Enpresan mailaz eta soldataz igotzea, herentzia bat jasotzea, etxe bat erosi ahal izatea, lagun ugari edukitzea… Arrakastaren laukitxo guztiak beteak ditu Jezabelek, argi du zer nahi duen bizitzan eta zirt-zart hartu ohi ditu erabakiak. Halako batean, ordea, txikikeria batekin paralizaturik geratuko da. Emakume gazte baten nora eza darabil Kattalin Minerrek gure gizarteko hainbat gai giltzarri jorratzeko: familia eta bikote ereduak, heteroaraua, harreman batean bilatzen duguna… Nortasunez beteriko lehenengo eleberri bat, irakurlearen gogoa astindu eta zer pentsatua emango diona.

Azaroaren 7an izango da hitzordua, Alondegiko Moila gelan, 18:00etan.

Hemen duzue liburuari buruzko material osagarria:
Kritikak
Elkarrizketa Sautrelan
Elkarrizketa Garan

Liburuari buruzko bideo ederrak eman zituen Gaztezulok:

Sergei Dovlatov-en “Maleta”

 

Urriko saioan Sergei Dovlatov (1941 Ufa-1990 New York) idazle errusiarraren Maleta eleberria izango dugu mintzagai.

Objektu gutxi batzuez beteriko maleta bat da. Dovlatovek Sobiet Batasunetik AEBetara emigratu zuenean berekin hartu zuen maleta. Emigratzeko asmotan dela, hara non esaten dioten hiru maleta besterik ezin duela eraman. Puskak biltzen hasi, eta ohartzen da hiru maleta ez, bakar bat aski duela bere ondasun guztiak sartzeko. Bere bizitza osoa maleta ezdeus batean bildurik. Eta halaxe abiatzen du kontakizuna, ipuin bat josiz maletan sartu zituen objektu bakoitzaren inguruan. Oroitzapen bat objektu bakoitzeko.

Eta halaxe harilkatzen ditu bere bizitzako zenbait pasarte, banan-banan, atzean utzi duen munduaren garratza, absurdoa eta zentzugabetasuna agerian utziz. Narrazio guztiak bere ohiko estilo arinean daude idatzirik: estilo arina, baina baita zorrotza, fina, gardena, sarkastikoa, garratza, ziztakaria ere. Eta vodkaz, vodka askoz bustirik.

Zorteko gara, gainera: EIZIEk abian jarri duen programa bati esker Amaia Apalauza itzultzailea ere gurekin izango da. Urteko liburuen zerrendan Literatura Unibertsala edo Urrezko Biblioteka bildumako libururen bat lantzeko asmotan diren irakurle-taldeei itzultzailea saiora gonbidatzeko aukera eskaini die EIZIEk. Elkartea arduratu da itzultzailearekin harremanetan jartzeaz, eta bere gain hartuko du saioak dakarren gastu erantsia. Aukera paregabea, beraz!

Dovlatov euskaraz irakurtzeko aukera gehiagorik. Eskura duzue Konpromisoa ere, Iker Sancho Intsaustik itzulia. 
Nahi izatera, hementxe duzue liburuari buruzko informazio osagarria:

Kritikak

Euskal Dovlatov baten bila artikulua.

Hitzordua: urriaren 3an, 18:00etan Alondegiko Moila gelan.

Laura esaten zioten

Iritsi da iraila, urruti zirudien baina! Datorren asteartean, hilaren 12an, ekingo diogu ikasturte berriari Irakurri Matte taldean.

“Laura esaten zioten” liburua izango da aurreneko irakurgaia eta mintzagaia. Leire Ibarguren idazleak Miren Odriozola herrikideak El Salvadorko gerrillan izandako borrokak eta bizipenak kontatu ditu kronika-liburu biografiko eder honetan. Ekintzaile konprometitu baten ibilerak topatuko ditugu, idealen eta hurkoen aldeko konpromisoa, gerraren eta maitasunaren lubakiak eta zuloak. Su-lerroa eta zaintza, elkartasuna eta bizirauteko ekina, Dokumentazio lan luzearen ondoren maitasunez ondutako lana lortu du Ibargurenek.

Gurekin izango ditugu Leire Ibarguren idazlea eta Miren Odriozola protagonista. Aukera paregabea izango da, ez galtzekoa. Gustu baduzue, 18:00etan elkartuko gara Alondegiko Moila gelan. Saioak irekiak dira: gonbidatuta zaudete!

Material osagarria:
Kritikak
–Aurkezpeneko bideoa

Datorren ikasturteko irakurgaiak

  • Hauxek izango dira irailetik abendura irakurriko ditugun liburuak:

–Irailaren 12an, “Laura esaten zioten” (Miren Odriozolaren borrokak) Leire Ibargurenekin eta Miren Odriozolarekin.

–Urriaren 10ean, “Maleta”, Sergei Doulatov.

–Azaroaren 14an “Nola heldu naiz ni honaino?” Kattalin Minerrekin.

–Abenduaren 12an “Lapur banden etika ala politika”, Joseba Sarrionandia.

 

Saio guztiak Alondegiko Moila gelan izango dira arratsaldeko 18:00etan.

 

Ekainean, “Hauts haietatik”

Unai VIllenaren “Hauts haietatik” nobelaz arituko gara ekaineko saioan. Idazle elgoibartarraren lehen eleberria da Igartza bekaren bultzadaz iaz argitaratu zena.

Bere lagun Anderren bizitza kontatu nahi digu Oierrek: gazte ausart eta bizizalea, lana, ikasketak, sexua, parrandak… dena ondo doakiona, harik eta zurrunbilo batean sartu eta geldialdirik gabeko gainbeheran jausi arte: drogen kontrola galtzea, agerpen psikotikoak, ospitaleratzea, desintoxikazio-zentroa, psikiatrikoa…
Adiskidetasun-istorio bat da hau, lagunak lagunari egindako maitasun-keinua; baita gaixo mentalei ezartzen zaien estigma sozialaren eta psikiatrikoen salaketa hunkigarria ere; eta, horrez gain, 80ko hamarkada hasieran jaiotako belaunaldiaren kronika: promesaz betetako haurtzaro oparoaren eta gaztaro hedonista baten ostean, maiz, etorkizun argirik gabeko helduaroa topatu duena.

Liburuari buruzko material osagarria:

Booktrailerra
Kritikak
Aurkezpeneko bideoa
Sautrelan Hasier Etxeberriak egindako elkarrizketa

Zita, ohi bezala, Alondegiko Moila gelan, arratsaldeko !8:ooetan. Idazlea ere gurekin izango dugu. Gonbidatuta zaudete!

 

 

Maiatzean, “Ehiztariaren isilaldia”

Maiatzeko saioan Luis Garderen “Ehiztariaren isilaldia” nobela izango dugu mintzagai, 2016eko Euskadi Literatur sarietako sari nagusia, hain zuzen. Poeta gisa ezagutzen genuen Garde, baina hau izan du aurreneko nobela. Zazpi poesia libururen ostean ekarri du lehen narratiba lana Pamiela argitaletxearen eskutik.
Bertan bi hari, edo bi nobela batean: Ezkabako presondegitik egindako ihesaldia kontatzen du batek, ihesaldi hori bera kontatzerakoan idazle batek egiten duen barne bidaia besteak. Tartean, Ezkabako historiaren enborrean biderkatzen diren adarrak, memoria historikoaren inguruko gogoetak, eta literatura berari buruzkoak.
Gerra zibilera garamatza eleberriak:
Ezkaba, 1938ko maiatzaren 22a. Preso matxinatu talde batek Iruñea ondoko San Kristobal Gotorlekuko ateak ireki ditu. Ihes jendetsua giza ehiza baten hasiera izanen da. Bi iheslari askatasunaren bila dabiltza inguruko haranetan barna.
Donemartie, gaur egun. Hedapen urriko poemen idazle batek Ezkabako ihesaldiari buruzko nobela bat hastea erabaki du. Bildutako agiriak eta lekukotasunak aztertu bitartean, bere memoriarekin bakarka geratu da. Memoria historikoa bere historiaren memoria bilakatuko da. Norberaren oroimena ere jazarle iruzurgilea delako.
Hemen duzue liburuari buruzko material osagarria:
Kritikak
–Elkarrizketa HItzen Uberan-en
–Bideo-elkarrizketa Euskalerria irratian