Monthly Archive for iraila, 2013

Astebetean bigarren poza baietz!

Heldu da asteburua. Hemen da San Miguel ligako kanporaketa, eta zumaiar arraunzalea eta Zumaiaren zalea irrikaz dago  bi estropada hauek ikusteko. Bihar Bermeon (18:00), eta etzi Portugaleten (12:00), datorren urteko ligan aritzeko bi leku egongo dira jokoan.

Bi egunetan erlojuaren aurka, bost talde buruz buruz: Cabo da Cruz, Isuntza, Meira, Zierbena eta Zumaia. Puntuak banatuko dituzte bi egunetan, eta gehien biltzen dituzten bientzat izango da saria. Berdinketa bada, bi egunetako denborak batuko dira.

Xanti Zabaletaren taldea ondo iritsi da estropada hauetara, sasoi puntu bikainean eta konfiantza handiarekin. Indartsu daude arraunlariak, eta ziurtasuna daukate bi egunetan lan ona egingo dutela. Aurrekariak daude beraiengan konfiantza izateko: batetik, ligako azken estropadetan emandako maila; bestetik, Zumaiak egin izan dituen lan onak kanporaketa honetan aurreko bietan: 2010ean eta iaz eutsi egin zion mailari; hirugarrenik, urte eta denboraldi osoan egin duten lan bikaina eta maila handikoa; eta azkenik, taldea eta ontzia gorantz datorren ziurtasuna; ematen du oraintxe daudela denboraldiko une gozoenean, teknikoki, fisikoki eta psikologikoki.

Arraun munduan dagoen ustea da inoizko kanporaketa berdinduena dela aurtengoa. Egia esatera, ia urteroko kontua izaten da berdintasunarena. Iaz ere antzekoa zegoen zabalduta, baina gero ez zen hain berdindua izan. Ikusiko da zer gertatzen den gaur eta bihar. Baina Zumaiari irabazteko asko egin beharko dute arraunean beste ontziek. Aurreko asteko poz ikusgarriaren ondotik, beste bat ekarri baietz arraunlariek herrira!

 

 

 

 

 

26 urte geroago…

Sailkapenak

Emakumezkoak

1. Zumaia 10:37,16
2. Hibaika +0:11
3. San Juan +0:18
4. Mecos + 0:25

Kontxako Banderaren lehen eguneko sailkapenak datu argigarriak ematen ditu. Uda osokoak banaka-banaka alboan jartzen bazaizkio, oraindik eta argigarriago bihurtzen da atzo Donostian gertatua. Zumaia Salegi jatetxea da traineru indartsuena, eta atzo ere erakutsi zien aurkariei hala dela. Bandera preziatua Zumaia bidean da, eta oker handi-handirik ezean, hemen izango da berriz. Berriz, hirugarrena izango delako. 1984an eta 1987an gizonezkoek ekarri zituzten, eta hau emakumezkoen aurrenekoa izango da.

11 segundoko tartea asko da. Mundu handi bat aurkarientzat. Itsasoaren iragarpenak onak dira, gainera, nahiz eta oraindik aldaketak izan daitezkeen. Datorren igandea, 2013ko irailaren 8a, Zumaiako arraunaren eta Zumaiako herriaren historiara igarotzeko gertu da.

Zumaia Salegi jatetxearen nagusitasuna azaltzeko atzoko estropada ikusi besterik ez dago. Hibaika aurrea hartuta ibili zen lehen luzean, pare bat segundo ere atera zizkien zumaiarrei. Hauek berean segitu zuten, arraunkera bizitu gabe eta behartu gabe. Lasai. Bere erritmoan joatea nahikoa izan zitzaion bereak eta bi jotzen ari zen Hibaika gertutik zaintzeko Lana biribildu bigarren luzean egin zuen Zumaia Salegi jatetxeak. Txikitu egin zuen estropada.

26 urte geroago, egun handia, beste egun handi bat bizitzeko aukera izango da.