Monthly Archive for iraila, 2009

Zumaia laugarren izan da Kontxan

Zumaiak laugarren postua egin du Kontxako Banderan. Rias Baixasek irabazi du, iaz bezala, Astillero, Getaria-Tolosa eta zumaiarren aurretik. Hasieratik gelditu da atzera samar Telmo Deun, eta azkenean, garaileak 22 segundo atera dizkio. Hala ere, lan aparta egin dute, Kontxako lau onenen artean izatea handia baita.

Gaurko sailkapena:

1. Galizia 10:48
2. Astillero 10:51:22
3. Getaria-Tolosa 10:51:52
4. Zumaia 11:10

Irati Manzisidor: “Sekulako estropada egin dugu”

Pozez txoratzen daude Zumaiako arraunlariak, Kontxarako sailkatu direlako, eta Irati Manzisidorren hitzak dira horren lekuko: “Sekulako estropada egin dugu. Getariarrek aldagelan esan digute gainean ikusten gintuztela. Gure patroiak ere esan digu getariarrak harrapatzen genituela. Bueltako luzean, Aquuarium parean, segundo batera geneuzkan. Esan izan balidate duela astebete Kontxan laugarren egingo dugula, berehala sinatuko nuen. Sailkatuta ere, uste nuen Getaria-Tolosak 15 bat segundo aterako zizkigula, baina lau eskas atera dizkigu. Astillerok ere gure denbora bera egin du, daukan taldearekin. Trainerua aldatu dugu, arraunak ere bai, eta guk ere hobera egingo genuen. Azkeneko txandan sufritu egin dugu, baina azkenean Hondarribiak ez du hobetu gure denbora. Oso pozik gaude, eta bihar gozatzera aterako gara. Presioa beste batzuek izango dute; guk ez. Uste dut galiziarrak direla indartsuenak; gaur lasai ibili dira, 31 paladatan eta.”.

Zumaia, Kontxako bandera irabazteko lau hautagaietako bat

Zumaia Kontxako Bandera irabazteko lehiatuko du bihar goizean. Emakumezkoen estropada jokatuko da 11:00etan (ETB1), eta han izango da herriko ontzia. Gaur izan da sailkapen estropada, eta zumaiarrak laugarren sailkatu dira, Rias Baixas, Getaria-Tolosa eta Astilleroren atzetik. Lau onenak sailkatzen zirenez biharko estropadara, hantxe izango dira herriko arraunlariak. Bigarren txandan arraun egin dute, eta bigarren izan dira, Getaria-Tolosaren atzetik, 5 segundora.
Gaurko sailkapena: http://www.donostia.org/info/ciudadano/fest_regatas.nsf/vowebContenidosId/NT00000932?OpenDocument&idioma=eus&id=A482875492102&doc=D
 

Zumaia bihar Kontxako Banderan sartu nahian

Bihar jokatuko da emakumezkoen Kontxako 2. Banderaren sailkatze estropada. 18:00etatik aurrera 11 ontzi lehiatuko dira. Lau aurrenekoak sailkatuko dira igandean bandera jokatzeko. Hamaika traineru hauek lehiatuko dira: Euskal Herritik, Bizkaia, Getaria-Tolosa, Hondarribia eta Urki; Galiziatik Rias Baixas, A Cabana eta Mecos; Kantabriatik Astillero; eta Kataluniatik CN Badalona eta CR Badalona. Hiru txanda jokatuko dituzte bihar: bitan lau ontzi aterako dira, eta batean hiru. Ez dira erlojuaren aurka ariko, eta hori ez zaie bidezkoa iruditzen arraunlariei, aldeak egongo direlako txanda batetik bestera. Igandean 11:00etan jokatuko dute estropada biharko lau onenek.

Egun hauetan, arraunlariak lekua izaten ari dira hedabideetan, eta zumaiarrek emandako iritziak bildu ditugu. Irati Manzisidorrek BERRIAn hauxe esan du: “Iganderako sailkatu nahi dugu. Oso zaila ikusten dut, dena den. Lehen bi postuak nahikoa garbi daude: Getaria-Tolosa eta Rias Baixas. Gero, bi posturako lau ontzi gaudela uste dut: Hondarribia hobeto dabil azkenaldian, Bizkaia ere gainean izan dugu denboraldian, Astillero ere hor dago, eta gu gara besteak”.
Izaro Etxanizek hauxe adierazio dio NOTICIAS DE GIPUKOAri: “Zaila izango da, baina iganderako sailkatzea da helburua. Denboraldian zehar ikusi da Getaria-Tolosa eta Rias Baixas besteen gainetik daudela. Biharkoa erlojuaren aurka ez jokatzearekin ez nago ados, aldeak egongo direlako txanden artean. Justua erlojuaren aurka aritzea litzateke”.
Joseba Aristi entrenatzaileak BALEIKE.COM-en egin ditu adierazpenak: “Gauzak ondo eginda aukerak dauzkagu. Galiziarrak eta Getaria-Tolosa barruan ikusten ditut okerrik ez bada; gero, Hondarribia, Astillero, Arkote eta gu gaude, eta bi postu bakarrik jokoan. Gure aurkari gogorrenak geu izan gaitezke ez baditugu nerbioak kontrolatzen. Ahalik eta lasaien joan behar dugu, konzentraturik, presioak kenduta eta batez ere gozatzera”.

Zumaia oso gaizki Kontxako sailkatze estropadan: hamabosgarren

Bukatu du denboraldia Zumaiak eta hala hobe. Oso justu amaitu dutelako. Gaurkoa adibide. Kontxako sailkatze estropadan 15. izan da. Adibide bat besterik ez da, baina sasoi guztian atzetik nabarmen izan duen Arkotek aurrea hartu dio gaur. Aurrena atera da Telmo Deun, eta bigarren luzean pasatu egin du Kaikuk, minutu bat lehenago abiatu arren zumaiarrak.

Iganderako hauek sailkatu dira: Kaiku, Urdaibai, Castro, Orio, Pedreña, San Pedro eta Hondarribia. Igandeko bi txandak honela gelditu dira: aurrenekoan, Urdaibai, Pedreña, Hondarribia eta Donostiarra. Bigarrengoan, Kaiku, Castro, Orio eta San Pedro.

Luxiaren azterketa gaurkoaz: “Ezer ez esatea da onena. Ez joan eta ez etorri, ez dugu ezer egin. Oso justu bukatu dugu denboraldia. Kaiku ere gainean izatea ez zen lagungarri izango. Bagenekien ia ezinezkoa zela sailkatzea, eta agian, etsita ere atera gara. Kontuak kontu, oso estropada txarra egin dugu”.

Gaurko sailkapena: http://www.kirolak.net/eu/competiciones.asp?temp=11&deporte=todos&deportetmp=remo&competi=documentos&cat=4

Zumaia aurrena aterako da Kontxako sailkatze estropadan

Eguerdian egin da zozketa, eta Zumaia aurrena aterako da, 18:00etan. Minutuz minutu, hurrenkera honetan joango dira, lehenik A multzokoak direla eta gero Bkoak: Zumaia, Kaiku, Castro, Zarautz, Urdaibai, Hondarribia, Pasai Donibane, Tiran, Astillero, Pedreña, San Pedro eta Orio; Deustua, Zierbena, Isuntza, Nautico Vigo, Cabo Cruz, Luanco, Perillo, Santurtzi, Hibaika, Trintxerpe, Arkote eta Camargo.
Eguraldiari dagokionez, Donostian dauden klubeko ordezkariek esan dutenez, itsasoa dago eta haizea ere bai.