Monthly Archive for uztaila, 2012

Gerta zitekeen, eta gertatu egin da

Zumaia Altuna Uriak eta Zumaia Salegi Jatetxeak ez dute egunik onena izan gaur, Euskadiko traineru txapelketan. Gizonezkoak azkena izan dira, zortzigarren, eta emakumezkoek brontzezko domina lortu badute ere, oso atzean ibili dira.

Ez dira emaitza harrigarriak izan. Gerta zitekeen, asteburu gogorra izan dutelako arraunlariek, eta egun gutxira jokatu delako txapelketa. Ez dira ondorio negatiboak atera behar gaurkoagatik.

Zumaia Altuna Uriak lehen txandan egin du arraun, Gipuzkoako eta Bizkaiko txapelketetan hirugarren eta laugarren izan ziren ontziak bildu dituen laukoan. San Pedro, Portugalete eta Santurtzi lehiakide. Eta laugarren kalean, denetan txarrenean, zumaiarrak. Hasieratik geratu dira atzean, eta horrela joan dira gauzak gero ere.

Txanda nagusian, Kaikuk irabazi die Urdaibai, Hondarribia eta San Juani, eta txapelketa hara joan da.

Asteburuan, Zumaia Altuna Uriak jai izango du lehiari dagokionez, San Miguel ligak atsedena duelako, Espainiako txapelketa delako Castron (Espainia).

Gaurko sailkapena.

Zumaia Salegi Jatetxea, burua galdu gabe

Lehen luzean lehian ibili dira zumaiarrak, Getaria-Tolosarekin batera eta San Juanen aurretik, baina ziabogan eta handik ateratzean, atzean geratu dira. Hortik aurrera, ikusirik ezinezkoa zela getariarren eta sanjuandarren ingurura gerturatzea, bere estropada egitera joan dira zumaiarrak, burua galdu gabe. Estropada garrantzitsua datoz hurrengo asteetan.

Datorren larunbatean, Gipuzkoako ligako bosgarren estropada dute, gaur bezala, Orion (16:30).

Gaurko sailkapena.

Argazkiak (Klausser).

 

 

Jubenilak hirugarren atzo, Loiolan

Jubenil mutilek batel estropada izan zuten atzo, Donostiako Loiola auzoko Saninazio jaiak direla eta. Hirugarren izan ziren. Hauxe sailkapena:

1. San Pedro 8.01,14
2. Ilunbe 2,26ra
3. Zumaia 8,54ra
4. Zarautz 23,67ra

 

Argazkiak (Klausser).

Ez jaisteko kanporaketari ihes egitetik oso gertu

Latza izan da Zumaia Altuna Uriak gaur egin duen estropada. Zazpigarren izan da Getxon, San Miguel ligako hamargarren estropadan, eta sailkapen nagusian, hiru puntura jarri da Pedreña eta Astillerotik (azken-hirugarrena eta azken-laugarrena). Ez jaisteko kanporaketari ihes egitea oso zail ikusten zen ostiralean, baina atzoko eta gaurko emaitzekin, hiru puntura dago zerua (ostiralean 6ra zegoen).

Atzoko lan onari esker, bigarren txandan aritu da Zumaia Altuna Uria, eta ahoa bete hortz utzi ditu zale guztiak. San Juan, San Pedro eta Portugalete izan ditu aurkari, eta hirugarren bukatu du. Bi pasaitarrek gainditu dute, eta oso aldea txikia aterata: San Juanek 4 , eta San Pedrok 3. Zumaiarrek Portugaleteri 2 segundo atera dizkio. Lan handia irudikatzeko eta gehiago nabarmentzeko, datu hau: azken ziaboga eman eta gero, lehen arraun kolpeetan, 10 segundo ateratzen zizkion aurrenekoak.

Zumaia Altuna Uriak lehen txandako lau ontzien denbora onena du.

Bandera Kaikuk irabazi du, eta lider jarri da ligan.

Gaurko sailkapena.

Ligako sailkapena.

Etzi, Euskadiko txapelketa eta asteburuan, ligarik ez

Zumaia Altuna Uria Euskadiko txapelketan izango da, etzi, Orion (12:30). Gipuzkoako txapelketan hirugarren egin zuen, eta horrek eman dio aukera Euskadikoan izateko.

Lehen txandan joango da, San Pedro, Santurtzi eta Portugaleterekin batera. Bigarrengoan, Hondarribia, San Juan, Kaiku eta Urdaibai lehiatuko dira. Zortzi traineruek dute bandera irabazteko aukera.

 

Irabazi eta irabazi

Zumaia Salegi Jatetxeak beste bandera bat lortu du gaur eguerdian. Euskotren ligako bosgarren estropadan izan da, Getxon.

Estu joan dira gauzak gaur ere, baina ez atzo bezain estu. Bi segundo eta erdira geratu da Galizia, eta ia hirura Getaria-Tolosa. Ziabogan ere zumaiarrak ziren aurretik, gero bukaeran izan den alde berarekin. San Juan atzerago sartu da, 18 segundora.

Azken luzean erabaki da estropada, eta hor, zumaiarrak argi ibili dira. Getaria-Tolosa eta Galizia lehen kalean ziren, nor baino nor, eta elkarren arteko borrokatik pixka bat aurrerago, Zumaiak bere lana bete du, dotore. Berea egin eta aurkariekin itsutu gabe.

Hiru estropada falta dira liga amaitzeko, eta bi puntu ateratzen dizkio Zumaia Salegi Jatetxeak Galiziari.

Gaurko sailkapena.

Ligako sailkapena.

Etzi, Euskadiko txapelketa

Han izango da Zumaia Salegi Jatetxea. Orion da estropada (12:00), eta ikusi egin beharko da nekeak zenbateko eragina duen talde guztietako arraunlariengan, asteburuko lan gogorrak bere onera ekartzeko ia astirik ez dutelako izango.

Beste bandera bat

Zumaia Salegi Jatetxea bide paregabean sartuta dabil, eta gaur ere bandera atera du, Pasaian. Gipuzkoako ligako laugarren estropada izan da.

Estu joan da estropada, erlojuaren aurka, zumaiarrak, Getaria-Tolosa eta San Juan. 26 ehunen egon da aurrenekotik hirugarrenera.

Zumaia lau segundo aurretik zen ziabogan, baina barruranzkoan, hobeto moldatu dira beste biak.

Gaurko sailkapena.

Ligan, lehen postuan segitzen du Zumaia Salegi Jatetxeak.

Ligako sailkapena.

Bihar ere estropada izango da. Euskotren ligakoa. Getxon izango da (12:00), eta gaurko lehen hiru sailkatuez gain, Galizia ere ariko da. Hor ere lehen postuan da Zumaia  Salegi Jatetxea.

Aspaldiko sailkapenik onena: zortzigarren

Zumaia Altuna Uriak lan ederra egin du gaur Pasaian, San Miguel ligako bederatzigarren estropadan. Zortzigarren izan da, aspaldiko emaitza onena lortuz. Eta beste emaitzak ere aldeko izan dira; Pedreñarena, kasu. Hiru puntu jan zaizkie espainiarrei, eta 6 puntura murriztu da haiek aldeko duten tartea.

Erlojuaren aurka aritu dira traineruak, eta bere txandan, zumaiarrek bigarren egin dute. Portugaletek irabazi die, eta gureek Pedreña eta Zierbena gainditu dituzte. Gero, bigarren txandako Astillerok eta Castrok ez dute hobeto Telmo Deunen denbora.

Bandera Kaikuk irabazi du.

Gaurko sailkapena.

Ligako sailkapena.

Bihar, Getxon jokatuko dute hamargarren estropada, eta gaurko sailkapena hartuko denez kontuan, Zumaia Altuna Uria bigarren txandan joango da, Portugalete, San Pedro eta San Juanekin batera.

 

Bina estropada asteburuan

Zumaia Altuna Uriak eta Zumaia Salegi Jatetxeak bina estropada izango dituzte asteburuan.

Bihar, Pasaian ariko dira, erlojuaren aurka. Zumaia Altuna Uriak San Miguel ligako bederatzigarren estropada izango du (18:30), eta lehen txandan ariko da, Zierbena, Portugalete eta Pedreñarekin; minutuko tartearekin aterako dira laurak.

Hiru ziaboga eta lau luze egin beharko dituzte.

Ligako sailkapenean, Zumaia azken-aurreko da.

Zumaia Salegi Jatetxeak Gipuzkoako ligako estropada izango du, laugarrena (18:00). Getaria-Tolosa, Orio, Hibaika, San Juan eta Hondarribia izango ditu arerio. Minutuko tartean aterako dira denak.

Ziaboga bat eta bi luze osatu beharko dituzte.

Sailkapenean, lider da Zumaia.

Igandean, Getxon

Etzi, Getxon izango dira bi traineruak. Gizonezkoek San Miguel ligako hamargarren estropada jokatuko dute, ohiko ereduan (ez erlojuaren aurka), biharko emaitzen arabera osatuz txandak (12:30).

Emakumezkoek Euskotren ligako bosgarren estropada izango dute (12:00). Lider dira zumaiarrak hor ere.

 

Bandera azken txanpan

Handia egin du gaur Zumaia Salegi Jatetxeak Pasai San Pedrok. Irabaztea bera ez da harrigarria, irabazteko modua baizik. Azkeneko txanpan erabaki da zumaiarren eta galiziarren arteko lehia, eta zumaiarrak nagusi, 28 ehunen tarteko. San Juan izan da hirugarren, eta Getaria-Tolosa laugarren.

Euskotren ligan aurten irabazi duten bigarren trapua da, lau estropada jokatu eta gero. Lehen postuan da Zumaia Salegi Jatetxea.

Gaurko denborak.

Ligako sailkapena.

Zumaia Altuna Uriak estropada ona, baina sari txikia

Bederatzigarren sailkatu da Pasai San Pedrok antolatu duen estropadan, San Miguel ligako zortzigarren jardunaldian.

Berezia zen eremua, motza, eta bost ziabogatara. Ez zen, itxuraz, zumaiarren aldeko lekua, baina egundoko lana egin dute Xanti Zabaletaren arraunlariek. Lehen txandan, Pedreña, Portugalete eta Zumaia segundo pasatxoan sartu dira, eta hirugarren bukatu dute zumaiarrek. Lan onari ezin emaitza hobea jarri.

Sailkapen nagusian, azken-aurreko segitzen du, jaitsierako kanporaketako lekuan, eta 6 puntura du hurrengoa, Portugalete.

Bandera Hondarribiak irabazi du, eta ligako lider segitzen du.

Gaurko denborak.

Ligako sailkapena.

Bi domina Gipuzkoako txapelketan

Gipuzkoako txapelketa handia egin dute Zumaia Altuna Uriak eta Zumaia Salegi Jatetxeak. Hirugarren eta bigarren izan dira, gaur Donostian, eta biak ariko dira Euskadiko txapelketan, hilaren 31n, Orion.

Zumaia Altuna Uriak poparean egin ditu ikusgarrizko lanak. Brankaz galdu duen denbora berreskuratu ahal izan du horrela. Datu hau argigarria da oso: beraiena izan da denborarik onena azken luzean parte-hartzaile denen artean.

Lehen txandan aritu da, eta hirugarren egin du, Hondarribia eta San Juanen atzetik. 12 segundo atera dizkio Gipuzkoako txapeldun izan den Hondarribiak, eta 7 San Juanek. Zumaiak San Pedrori 10 atera dizkio, eta Oriori (azkeneko txandan joan da) beste horrenbeste. Azken luzean, olatu bat ikusgarri hartu dute zumaiarrek, ikusleak ahoa bete hortz utziz.

Zumaiarrekin batera, Hondarribia, San Juan eta San Pedro ariko dira Euskadiko txapelketan, Bizkaiko txapelketako lau onenekin batera (datorren asteazkenean da, Lekeition).

Emakumezkoak bigarren

Zumaia Salegi Jatetxea bigarren izan da. San Juanek irabazi dio, 10 segundoko tartearekin. Zumaiarrek 9 atera dizkiote Getaria-Tolosari. Txanda berean joan dira hirurak. Bi luzetara egin dute lan, eta San Juan izan da azkarrena ziabogan; 3 segundora ziren zumaiarrak, baina poparean tartea handitu egin da.

Gaurko sailkapenak.