Monthly Archive for iraila, 2010

Helburua bete du Zumaiak: datorren urtean ere San Miguel Ligan

Zumaiak onenetako bat izaten segituko du datorren denboraldian ere. San Miguel Ligan ariko da seigarren urtez jarraian. Gaur, Portugaleten, amaiera bikaina eman dio igoera-jaitsiera kanporaketari, irabazi egin baitu. Erlojuaren aurka, Camargo, Meira eta Santurtzi utzi ditu atzean. Atzoko emaitza bera izan da gaur ere. Denbora-tarteari dagokionez, Camargori 3 segundo atera dizkio, Meirari 8, eta Santurtziri 12. Puntuen sailkapenean, Zumaiak 8 bildu ditu bi egunean, Camargok 6, Meirak 4, eta Santurtzik 2. . Camargok lortu du bigarren txartela, eta San Miguel Ligan izango da hurrengo urtean. Denboraldiko helburua bete du honenbestez Telmo Deunek. Mailari eustea zen asmoa, eta lortu du. Estropada amaitu eta gero, poza zen nagusi zumaiarren artean, baita lasaitasuna ere. Denboraldia gogorra egin zaie arraunlariei eta entrenatzaileei, Liga hasieratik garbi gelditu zelako kanporaketa hau jokatu beharko zela mailari heltzeko. Bi hilabeteotan, lana beltz egin dute guztiek, eta meritu handia dauka horrek. Ederki prestatu dira tarte horretan, eta emaitza atzo eta gaur azaldu dute. Beste urtebetez, Zumaia arraunaren elitean izango da.Gaurko denborak eta kanporaketako azken sailkapena: http://www.ligasanmiguel.com/resultados/ver.php?id=eu&r=1269260149p1000681.JPGp1000683.JPG

Lanaren beste erdia egitea falta da

Irabazi egin du Zumaiak San Miguel Ligako igoera-jaitsierako lehen estropada. Camargo izan da bigarren, Meira hirugarren eta Santurtzi laugarren. Zumaiak lau puntu dauzka, Camargok hiru, Meirak bi eta Santurtzik bat. Bihar erabakiko da zein bi talde ariko diren San Miguel Ligan datorren denboraldian. Portugaleteko estropada 12:00etan da, eta erlojuaren aurka lehiatuko dira, gaur bezala. Irteera ordena hau izango da: Santurtzi, Meira, Camargo eta Zumaia.Telmo Deunek hasieratik hartu du estropada burua, eta aldeak areagotzen joan da. Estropadaren bigarren erdian 8 segundo kentzen zizkion bigarrenari, Meirari, eta 10na Camargori eta Santurtziri. Hirugarren eta laugarren luzean Camargok gora egin du, eta 8 segundo jan dizkio Zumaiari. Azkenean, bi segundoko aldea egon da zumaiarren eta espainiarren artean. Meira 16ra gelditu da, eta Santurtzi 18ra. Azken sailkapenean puntu berdinketa badago, bi egunetako denborak batuko dira, eta halako zerbait gertatzen bada, oso garrantzitsua da gaur Zumaiak Meirari eta Santurtziri ateratako alde handia.Luxiak hau adierazi du gaurkoari eta biharkoari buruz: “Lana biribiltzea falta izan zaigu. Oso indartsu atera gara, batere erreferentziarik ez genuen, eta agian, azken luzean, ordaindu egin dugu hasierako ahalegina. Azken luzean ez gara ondo etorri, eta arrazoia hori izan daiteke, edo bestela, arraunean presaka aritu garela. Kontuak kontu, aurrena gaude, eta bihar lan hobea egingo  dugula uste dut. Azkenak aterako garenez, erreferentziak edukiko ditugu, eta garrantzitsua izango da hori. Meirari eta Santurtziri alde handia atera izana ere gure alderako da”.Gaurko denborak eta sailkapeneko puntu banaketa: http://www.ligasanmiguel.com/resultados/ver.php?id=eu&r=1269260064

Kale edo bale

zumaia-pedrena.jpg Argazkilaria: JUAN CASTANEDOHeldu da denboraldiko asteburu garrantzitsuena. Heldu da Zumaiak San Miguel Ligan dagoenetik jokatu beharko duen estropada pare garrantzitsuena. Bihar eta etzi erabakiko da Telmo Deun datorren denboraldian ere Liga onenean egongo den. Hiru aurkari dauzka helburu berarekin: Santurtzi eta Camargo (KAE 1 Ligako lehen biak), eta Meira (Galiziako Ligako bigarrena). Birentzako izango da saria. Bi estropadak erlojuaren aurka jokatuko dituzte. Bihar, Bermeon da lehen lehia, 16:30ean, eta etzi, Portugaleten, 12:00ean.Zumaiarrak konfiantzaz daude helburua betetzeko. Oso entrenamendu onak egin dituzte, kanporaketa behar bezala prestatzeko. Baina aurrez eginak ez du askorik balio, uretan eta lehiaketan erakutsi behar delako gero. Lau traineruen arteko erreferentziak badira: Kontxarako sailkatze  estropadan Camargo izan zen onena, Zumaiari 13 segundo kendu zizkion, Santurtziri 20 eta Meirari 51. Hurrengo erreferentzia hobea da zumaiarrentzat; handik bi egunera, Lekeition lehiatu ziren Camargorekin, eta 22 segundo azkarragoa izan zen Telmo Deun.Bosgarren denboraldia du hau Zumaiak San Miguel Ligan. 2005ean igo zen, eta aurreko urteetan inoiz ez da egon aurten bezalako ataka zailean. Beti izan du helburutzat Ligan jarraitzea, eta aurten ere horixe da betebehar nagusia. Bihar eta etzi gauzak ondo ateratzen badira, denboraldiko asmoa beteko dute arraunlariek eta klubak. Heldu da kale edo bale egiteko ordua.Protagonisten adierazpenak hemen daude, blogak.baleike.eus atariak bilduta: http://blogak.baleike.eus/index.php?option=com_content&task=view&id=4305&Itemid=68

Ioseba Urbieta, eskerrak ematen

Ioseba Urbietak, Zumaia Kiroljokoako entrenatzaileak, denboraldia amaitu duten honetan, eskerrak eman nahi dizkie urtean zehar laguntzen egon zaizkien guztiei, eta idatzi hau egin du:

Urte zaila izan da, baina bueno, emaitza aldetik nahiko txukun ibili gara. Esan nahi dudan gauza bakarra hau da: jendeak igual pentsatuko du bakarrik egon naizela nire lanean, eta beti Ioseba Urbieta izan dela entrenatzailea, baina ni momentu zailetan ez  naiz bakarrik sentitu, eta jende horren izenak azaltzea nahi dut. Ezin ditut ahaztu egunero hor lan zikina egiten ari diren Bixente, Iñaki txoferra, Goiko, Patxi Urbieta (bere deia izaten zen estropa bakoitzean aurrenekoa, eta beti egon da nirekin), arraunlari batzuk (arraunlariak baino gehigo nire lagunak dira: Ipar, Karrijo, Jokin, Inge…), Iñaki Unanue (kanpotik lagundu izan dit bere iritziekin), eta seguru ahazten ditudan beste asko.

Hauetaz aparte, Kikerekin akordatzen naiz, eta pena daukat hauengatik azkeneko bandera potoloa ekarri ez izana, zeren nik beraien banderak neure sentitu ditut, eta guk ateratakoak beraienak direla sentitzea nahiko nuke… beti elkarri laguntzen egon gara, eta hori asko eskertzen da.

Bueno, eta Kike aipatu eta gero, bereziki Larra Txikikin akordatzen naiz. Hori bai egon dela momentu denetan, onetan eta txarretan. Nik gaizki pasa dudan denetan bera nirekin egon da, eta beti lagundu izan dit, eta hori ez da diruakin pagatzen. Bateletan elkarrekin ginen, trainerilletan ere gurekin etortzen zen, traineruan ere eskatu izan diodanean eta ahal izan duenetan gurekin egon da: Galiziarako bidaietan, bazkari bat egin behar zenean, denborak ematea nahi nuenean lehorretik (erreferentziak), fuerabordan etortzeko eskatu diodanean… Denetan egon da, eta hainbeste merezi du!!

Niretzat inportantea da hor ezkutuan egon zareten pertsona horiek denak bukaeran behintzat agertzea. Nik zuek denoi asko eskertzen dizuet, eta merezi duzue!

Emakumezkoen Kontxako Bandera: argazki bildumak

Hemen da bat, sailkatze estropadakoa. Argazkiak: KLAUSSER. http://picasaweb.google.com/Arrauner/NeskakKlasifKontxa110910#Hemen beste bat, igandekoa, blogak.baleike.eus webgunetik hartua. Argazkiak: GORKA ZABALETAhttp://picasaweb.google.com/104752109742156513441/KontxakoBandera2010?pli=1&gsessionid=fbtPudkFWfB7k08VmGoRgQ#slideshow/5515998148237402722

“Oso urruti daukagu bandera”

Estropada handia egin du Zumaia Kiroljokoak, eta bihar Kontxako estropadan ariko da. Bigarren denbora onena egin du sailkatzeko borrokan (11.10,92). Getaria-Tolosa izan da onena (11.09,34). Hirugarren Galizia sailkatu da (11.11,30), eta laugarren Bizkaia (11.23,56). Lehen hirurak bi segundoan sartu dira, eta bandera irabazteko hiru hautagaiak dira. Bihar jokatu da lehia nagusia (11:00).Joseba Urbieta entrenatzailea oso gustura da arraunlariek egin duten lanarekin: “Sekulako estropada egin dugu. Beroketa ikusgarria izan da, eta pentsatu dut denbora onena egiteko ere gai izan gintezkeela. Gertu izan gara”. Biharkoari begira, behin eta berriz aipatu du hitz hau: burua. “Lehen aldiz lehiatuko gara hirurok batera sasoi honetan, eta burua funtsezkoa izango da. Guk ez dugu ezer galtzeko, beste biak dira faboritoak. Lan ona egin nahi dugu, gaur bezala, eta hala bada, ez gara urruti izango. Baina gaur-gaurkoz, bandera oso urruti daukagu”.Zumaiarrek beste aukera bat dugu bihar arraunaz eta gure arraunlariez gozatzeko. Gertatzen dena gertatzen dela, arraunlariek sekulako omenaldi beroa merezi dute, sasoi bikaina egiten ari direlako. Bihar, denok Donostiara!

“Sailkatzen bagara, igandean ez dugu ezer galtzeko”

Bihar jokatuko du Zumaia Kiroljokoak Kontxako Banderara sailkatzeko estropada. 18:00etan hasiko da erlojuaren aurkako lehia, eta hamalau traineru ariko dira. Bi multzotan banatu dituzte. A multzoan hauek daude: Astillero, Bizkaia, Galizia, Getaria-Tolosa, Hondarribia, Orio, San Juan eta Zumaia Kiroljokoa; B multzoan beste hauek: Cantabria, Betulo, Dogrove, Badalona, Torrevieja eta Comunidad Valenciana. Lau denbora onena egiten dutenak sailkatuko dira iganderako (11:00). Joseba Urbieta zumaiarren entrenatzailearen ustez, “bihar sailkatuko garelakoan gaude. Gauzak ondo direla, barruan behar genuke. Iaztik hona, hor dago aldea, orduan sartu izana arrakasta izan zen, eta aurten, badugu nolabaiteko presioa sartzeko, denboraldiko emaitza onak ikusita. Biharkoan burua da garrantzitsua. Lasai atera behar dugu, eta geurea egitera. Hala bada, barruan izango gara”. Egun hauek luzeak egiten ari zaizkiela onartu du: “Luze doa. Desiatzen gaude biharko eguna iristeko, eta urduritasun puntu hori badugu”. Urbietak biharkoan du burua, baina etzikoaz ere mintzatu da, beraiek barruan izango direla kontuan hartuta: “Igandean, ez daukagu ezer galtzeko. Jarriko diogu geure buruari helbururen bat, baina presioa Galiziak eta Getaria-Tolosak dute, faboritoak haiek direlako”.neskak-txapeldun.jpg

Arraunean hasteko gonbitea

Zumaiako Arraun Elkarteak arraunean hasteko gonbitea luzatu nahi die 12 eta 18 urte arteko neska-mutilei. Etzi izango dute aurreneko entrenamendua, 17:30ean, elkartearen instalazioan. Herritarrei eta herritik kanpokoei zuzendua da deialdia. Harrobiko arraunlariek ere egun eta ordu berean egingo dute denboraldiko lehen entrenamendua.

Kontxa prestatzeko kontzentratu egin dira

Zumaia Kiroljokoak datorren zapatuan jokatuko du Kontxara sailkatzeko estropada, eta gauzak bere-berean joaten badira, igandean bertan ariko da bandera preziatuaren bila. Denboraldiko estropada nagusia behar bezala prestatzeko, arraunlariak eta Joseba Urbieta entrenatzailea kontzentratuta daude atzo iluntzetik, Zumaian bertan dagoen Santaklara nekazal-etxean. Ostegunera arte egongo dira, eta egun horretan, arratsaldean Donostiara joango dira, entrenamendua egitera. dsc_0112.JPG

Galiziari eman dio Euskotren Liga Lehiaketa Batzordeak

Eman du epaia Lehiaketa Batzordeak, eta Euskotren Liga Galiziari eman dio. Hemen dago ebazpena: http://www.ligasanmiguel.com/noticias/ver.php?id=eu&n=1283782491&desde=