Monthly Archive for apirila, 2011

Emakumezkoen batela Espainiako Txapelketan

p1000765.JPGBihar eta etzi Espainiako Batel Txapelketa jokatuko da Ferrolen (Galizia), eta han izango da Zumaiako ordezkaritza, emakumezkoen batela, hain zuzen. Seniorren mailan ariko da, eta bihar sailkatzeko estropada izango dute jokoan. Beste zazpi aurkariak hauek dira: Astillero eta Trasmiera (Kantabria), Chapela, Samertolameu, Mar de Bueu, Cabo da Cruz eta A Cabana (Galizia), eta San Juan eta Lutxana (Euskal Herria). 17:00etan daukate bihar, eta lau azkarrenek jokatuko dute etziko finala, 17:00etan hori ere.

Trainerillak, bihar Zarautzen, eta etzi Pasai Donibanen

Gipuzkoako Trainerilla Ligako hirugarren eta laugarren jardunaldiak jokatuko dituzte bihar eta etzi. Zarautzen da biharkoa, 16:30ean, eta Pasai Donibanen etzikoa, 10:30ean. Hantxe izango da Zumaia, gizonezkoen eta emakumezkoen ontziekin: seniorrak eta jubenilak izango dira aurrenekoen kasuan, eta seniorrak bigarrengoen baitan.mutriku-16-04-11-031.jpg Zumaiako bi trainerilla Mutrikuko estropadan, duela hamabost egun. KLAUSSER

Urdaiazpikoaren Estropadako bandera, Zumaiara

Traineruan aurreneko estropada jokatu, eta irabazi. Horixe egin dute gaur goizean Zumaiako arraunlariek. Emakumeen estropada jokatu da Baionan (Lapurdi), eta denboraldi honetako lehen estropada izan du herriko ontziak. Bada, erraz irabazi dute Urdaiazpikoaren Estropadako bandera. Errobi ibaian lehiatu dira Hondarribia eta bertako Ibaialde taldeekin batera, eta hondarribiarrei 38 segundoko tartea atera diete Joxe Enrike Manterola entrenatzaile duten arraunlariek. Erlojuaren aurka jokatu da estropada. Banderarekin batera urdaiazpiko bat eman diete irabazleei.

Badute meritua Zumaiakoek, traineruko kide guztiekin bost entrenamendu bakarrik egin dituztelako orain arte. Emaitzak indarra emango die hurrengo erronka prestatzeko: maiatzaren 18an, Euskotren Ligara sailkatzeko estropada jokatuko dute Gipuzkoako klubek.
urdaiazpikua-bandera.JPG
Arraunlariak eta Joxe Enrike Manterola gaur, Baionatik heldu berritan, banderarekin. Arraunlari batzuk falta dira.

Euskadiko onenen artean

Hirugarren postua eta podiuma. Horra Euskadiko Txapelketako emaitza, emakumezkoen batelarena. Atzo zeukaten finala, eta aurrea hartu zieten zumaiarrei San Juanek eta Hibaikak. Pasaikoek zazpi segundo lehenago bukatu zuten, eta errenteriarrek sei azkarrago. Laugarren Lutxana sailkatu zen, zumaiarrengandik sei segundo pasatxora.

legutiano-17-04-11-309.jpg 
Zumaiako seniorren batela, atzo, Legution. KLAUSSER

legutiano-17-04-11-546.jpg
Ezkerretik eskuinera, Leire Antia, Atsegin Odriozola, June Aranbarri, Irati Zubieta eta Nagore Osoro, brontzezko dominekin, atzo. KLAUSSER.

Emakumezkoekin segituz, kadeteen batela kontsolazio finalean aritu zen, eta laugarren bukatu zuen, Ondarroa, Kaiku eta Getariaren atzetik.legutiano-17-04-11-030.jpg

Kadeteen batela, atzoko estropadan. KLAUSSER.

Gizonezkoetan, jubenilek kontsolazio finala jokatu zuten, final nagusira ez baitziren sailkatu larunbateko estropadan, eta irabazi egin zuten. Elantxobe izan zen bigarren segundo eta erdira, hirugarren Tolosaldea seira, eta laugarren Ilunbe hamahirura.

legutiano-17-04-11-247.jpg 
Jubenilak, atzoko lanak bukatu eta gero. KLAUSSER

Onenak berriz ere Federazio Kopan; Ligan bosgarren

Atzo jokatu zen Mutrikun Gipuzkoako Trainerilla Ligako bigarren estropada, eta zumaiarren emaitzak ez ziren bezperan bezain biribilak izan, bi ontzi nagusien lana kontuan hartzen bada, behintzat. Izan ere, larunbateko lana berdindu zuen Zumaia Bk, berriz ere aurrena eginez Federazio Kopan, baina Ligako ontzia bosgarren posturaino atzeratu zen, larunbatean bigarren egin eta gero. Zumaia C hamaikagarren izan zen, larunbateko emaitza bera lortuz.

Ligako estropadan onena San Juan izan zen (14.06,08), bigarren Hondarribia 1,72ra segundora, hirugarren Zarautz 11,61era, laugarren Getaria 24,34era eta bosgarren zumaiarrak 29,10era. Gero sailkatuz ziren Orio, Mutriku eta San Pedro. Ligako sailkapenean, Zumaia hirugarren da 15 punturekin, Zarautzekin berdinduta. Hondarribia da lider 19rekin, eta San Juan bigarren 18rekin.

Federazio Kopan, Zumaia Bk lehen estropadan baino alde handiagoa atera zien kontrarioei. Zumaiarren denbora 14.31,01 izan zen. Zarautz Bri 11,53 segundo atera zizkion, San Juan Cri 22,93, San Juan Bri 31,42, eta Orio Bri 43,55. Federazio Kopako sailkapenean, Zumaia B da lider 32 punturekin, eta San Juan B bigarren 28rekin.
mutriku-16-04-11-204.jpg
Zumaiako Ligako trainerilla, larunbateko estropadaren hasieran. KLAUSSER

Hasiera oso ona

Gaur hasi da Gipuzkoako Trainerilla Liga, eta Mutrikuko estropadan lan bikaina egin dute zumaiarrek: Ligan bigarren, eta Federazio Kopan aurrena.

Hondarribia nagusitu da Ligan (14.26,36), baina oso gertu izan du Zumaia, bi segundora ez baita heldu aldea (1,97). Hirugarren San Juan sailkatu da 4,19ra, laugarren Zarautz 12,36ra, bosgarren Orio 15,52ra, Getaria seigarren 56,54ra, zazpigarren San Pedro 58,99ra, eta zortzigarren Mutriku 59,90era.

Federazio Sarian zumaiarren denbora 14.57,32 izan da, eta gainerako hamabi ontziak atzetik sailkatu dira. Bigarren San Juan B izan da 1,58ra, hirugarren San Pedro B 18,22ra, laugarren San Juan C 26,81era, bosgarren Zarautz B 55,02ra, eta seigarren Orio B 1.04, 68ra. Zumaia C hamaikagarren izan da, 2.37,87ra.

Bihar jokatuko dute bigarren estropada, Mutrikun bertan, 11:00etan hasita.

Trainerillen denboraldia hasiko da bihar Mutrikun

Bihar ekingo zaio trainerillen Gipuzkoako Ligari. Mutrikun (Gipuzkoa) da aurreneko estropada, 17:00etan, eta hantxe izango da Zumaiako ordezkaritza, hiru ontzirekin, hirurak gizonezkoenak eta senior mailakoak. Etzi izango da bigarren jardunaldia, leku berean, 11:00etan.

Euskadiko batel txapelketara lau batelekin

Bihar eta etzi jokatuko da Euskadiko Batel Txapelketa, Legutioko urtegian (Araba). Zumaiak lau ontzi eramango ditu: emakumezkoetan kadeteena eta seniorrena, eta gizonezkoetan infantilena eta jubenilena. Bihar 16:00etan da estropada, eta etziko finaletarako zein sailkatuko diren argituko da. Etzi, 11:00etan hasiko da lehia.

Zumaiarren artean, seniorrak eta jubenilak doaz emaitza ona lortzeko itxaropenarekin. Emaitza ona litzateke, hasteko, finaletara sailkatzea. Eta behin finalean sartuta, faboritoen artean leudeke Txapelketa irabazteko. Jubenilak konfiantza betez doaz, aurreko astean Gipuzkoako Txapelketa irabazita, eta seniorrak ere indartsu daude, txapelketa berean bigarren bukatu eta gero, lan handia eginez.

Jubenilak nagusi

Igandean jokatu zen Gipuzkoako Batel Txapelketa, Pasai San Pedron. Eta zumaiarrentzat goiz ederra izan zen. Jubenilek irabazi egin zuten, gizonezkoetan. Bezperan ere denbora onena egin zuten, sailkatze estropadan, eta atzo ere indartsuenak zirela erakutsi zuten.

Bezperan bezala, oso lehia estua izan. Lau batelak bost segundoren barruan sartu ziren. Zumaiaren atzetik Tolosaldea sartu zen, hiru segundora; San Juan izan zen hirugarren, hiru segundora hori ere; eta Ilunbek itxi zuen txanda, bost segundora. Lehen luzean aurrea hartu zuten Jon Larrañagak entrenatzen dituen arraunlariek, baina bigarrenean, Tolosaldeak harrapatu eta pasa egin zituen; hiru segundoko atzerapena zuten gorriek hor. Baina hirugarren luzean, berriz ere muturra hartu zuten, eta amaiera arte ez zioten utzi leku pribilegiatuenari.

Normala den bezala, pozez txoratzen zeuden arraunlariak. Ligan ez dute behin ere arraunak altxatzea lortu, nahiz eta gertu ibili batzuetan. Baina asteburuan, Txapelketa jokatzeko ordua heldu denean, sekulako maila eman dute harrobiko arraunlariek.

Orain, Euskadiko Txapelketa daukate begiz jota, eta asteburuan eman duten mailaren parera iristen badira, kontuan hartzeko batela izango da. Larunbatean eta igandean jokatuko da Legutioko urtegian (Araba).

 

gipuzkoako-txapelketa-10-04-11-329.jpg

Seniorrak, bigarren

Emakumezkoak ere finalean ziren atzo. Seniorrek lortu zuten bezperan hor aritzeko aukera, eta lan ona egin zuten atzo ere. Bigarren izan ziren Joxe Enrike Manterolaren arraunlariak. Estropada guztian ibili ziren postu horretan. Entrenatzailea pozik da: “Oso gustura nago estropadarekin. Maila handia dago, San Juan asko ibiltzen da, Hibaikak indar handia du, eta bigarren egitea ondo dago”. Helburua irabaztea zela onartu arren, bigarren postua txarra ez dela oso garbi dauka: “Bigarren egin genuen bezala egin genezakeen laugarren, berdintasuna ikaragarria delako”. Arraunean nola egin zuten ere gustatu zaio: “Indar gutxiago daukagu besteen aldean, baina ondo egin zuten arraunean”. Bigarren postua ez zen sari bakarra izan bateleko kideentzat. Izan ere, Nagore Osoro patroiari eman zioten ziaboga onenaren saria. 

Orain, jubenilak bezala, Euskadiko Txapelketara joango dira. Eta lan ona egiteko itxaropen handiarekin doaz.

gipuzkoako-txapelketa-10-04-11-386.jpgEmakumeetan, beste batel bat ere lehiatu zen atzo: kadeteena. Federazio Sarian aritu zen, bezperan ez zelako sailkatu finalerako. Buruz buruko estropada izan zuen Orioren aurka, eta oriotarrak izan ziren azkarragoak, hiru segundogatik. Hauek ere Euskadiko Txapelketan izango dira, infantil mutilak bezala.gipuzkoako-txapelketa-10-04-11-024.jpg 

Argazki gehiago, KLAUSSERREK ateratakoak, hemen: https://picasaweb.google.com/Arrauner/GipuzkoakoTxapelketa10042011#

Gipuzkoako Txapelketa irabazteko bi aukera, bihar

Zumaiako bi batel ariko dira bihar Gipuzkoako Txapelketa irabazteko borrokan: emakumezkoetan, seniorrak, eta gizonezkoetan, jubenilak. 11:00etan hasiko dira estropadak, Pasai San Pedron. Gaur goizean, bi ontzi horiek sailkatu dira biharko finaletarako; beste hirurek ez dute lortu, eta hiru horietatik emakumezko kadeteek bakarrik jokatuko dute Federazio Saria. Gizonezkoetan, infantilak eta kadeteak, kanpoan geratu dira, azken-aurreko eginda.clascampgipuzkoa-259.jpgJubenilak, gaurko estropadan. KLAUSSER

Sailkatu diren bi batelen emaitza ez da berdina izan. Jubenilek aurrena egin dute, eta emakumezkoek hirugarren. Baina bi mailetan berdintasuna izan da nagusi. Jubeniletan, lehen lau ontziak hiru segundotan sartu dira, eta seniorretan zazpi segundotan. Jubenilen aurkariak Tolosaldea, San Juan eta Ilunbe izango dira, eta seniorrenak Hibaika, San Juan eta Tolosaldea. Harrigarria izan da jubeniletakoa, San Pedro Ligako garaile nagusia eta estropada ia denen irabazlea ez delako sailkatu. Lehia oso irekia aurreikusten da zumaiarren bi estropadetan.clascampgipuzkoa-141.jpg

Seniorrak gaur, Pasai San Pedron. KLAUSSER